Descrizione, testo e note nel documento allegato.
Gh’éra a Mesách do bèi signurén
Agnese e Virginia dô muretén,
ma sua mòm ia quarciava
per pagüra che un quéi giüvinòtt ghi a vardava.
Per fà che se vestiven minga tònt bèn
prima de andà a laurà insèm
la mòm l’andava sœu in stònsa
e la ghe parlava e la ghe diséva:
– O tusòn, se l’è mai nüver
e che aqua g’ha de vegné,
meti sœu ul scusâ scür che g’hi lé.
Una dümèniga hin andâ a dutrina
ma cala fésta lé Agnese l’ha girâ la strada
l’ha crumpâ ul bigliètt del sgéch con ‘na sua amisa
e se l’hònn svignada.
Hin andâ al cinema de Vimercâ
e la cumpagnia l’hònn truvada là.
A chi tèmp là l’éra un pecâ
andà al cinema de Vimercâ:
te séret segnada
e la gènt la parlava.
Sua mòm l’ha sentü l’udù,
l’è andada in gésa
l’ha cumenciâ a dugià de ché
e a sbircià de là,
vüna la vedéva
e quel’óltra chisà in de l’éra.
Sta dòna disperada
l’è andada a cuntrulà in usterìa
se l’héra crumpâ ul bigliett per andâ via.
Quéll là al g’ha di che n’ha crumpâ dü
vœun per lé e vœun per la sua amisa.
La dava fœura de matt in usterìa,
in de quel’óltra mòm I’è curüda:
– O tusa, te se ché frésca mè ‘na rœusa
e g’hém in gir i tusòn a strœusa.
Tœutt dô cont in mòn i sibrètt
hin partî cumè i saètt,
al cinema hin arivâ
hònn dumandâ in de l’éra pugiâ.
Con dü giuvinutèi éren i dô amìs
ghe pariva de vès in Paradìs,
hin vegnü fœura tœutt alégher
ma hònn truvà i mòm ch’éren négher.
La mòm de Agnese la g’ha mulâ un sgiafetón
pôra tusa la preferiva muré debón;
quel’óltra la g’ha dâ una scürlida
e fina a sira l’éra minga finida.
Hònn duvü vegné a câ denòns de lur
e hònn fá tœutt la strada a pê.
La mòm l’amisa la g’héra i mestürasión
e una vœulta i pannolini éren de tilón
hònn cuminciâ a sgarbelà
la pudéva pœu a caminà;
quel’óltra tüta strada a pregà
la gh’éra pœu il fiâ de parlà.
Éren stracch e cunsciâ asê
ma sudisfâ che i sò tusòn ghi héren dedrê.
